బ‌ట్ల‌ర్ దంచుడు..ఆర్సీబీ హ్యాట్రిక్ మిస్

వ‌రుస‌గా రెండు విజ‌యాలు సాధించి ఊపు మీదున్న ఆర్సీబీకి హోం గ్రౌండ్‌లో ప‌రాభ‌వం ఎదురైంది. గుజ‌రాత్ టైట‌న్స్ 8 వికెట్ల తేడాతో గెలిచింది. మొద‌ట బ్యాటింగ్ చేసిన ఆర్సీబీ 20 ఓవ‌ర్ల‌లో 8 వికెట్లు న‌ష్ట‌పోయి 169 ర‌న్స్ చేసింది. ఓపెన‌ర్లు సాల్ట్, కోహ్లీ నిరాశ‌ప‌ర‌చ‌గా…మిడిల్ ఆర్డ‌ర్‌లో లియామ్ లివింగ్‌స్ట‌న్, జితేశ్ శ‌ర్మ ఆదుకున్నారు. లివింగ్‌స్ట‌న్ హాఫ్ సెంచ‌రీ సాధించాడు. చివ‌ర్లో డేవిడ్ దూకుడుగా ఆడ‌టంతో ఆ మాత్రం స్కోరైనా వ‌చ్చింది. గుజ‌రాత్ టైట‌న్స్ 170 టార్గెట్‌ను ఆడుతు పాడుతూ చేజ్ చేసింది. ఓపెన‌ర్ సాయి సుద‌ర్శ‌న్ 49 ర‌న్స్ చేసి ఔట‌వ‌గా..జాస్ బ‌ట్ల‌ర్ దుమ్మురేపాడు. 39 బాల్స్‌లో 73 ర‌న్స్ చేసి నాటౌట్‌గా నిలిచాడు. ఇందులో 5 ఫోర్లు, 6 సిక్స‌ర్లు ఉన్నాయి. మ‌రో ఎండ్‌లో రూథ‌ర్‌ఫోర్డ్ కూడా దూకుడుగా ఆడి 18 బాల్స్‌లో 30 ర‌న్స్ చేసి నాటౌట్‌గా నిలిచాడు. ఈ ఇద్ద‌రి ధాటికి గుజ‌రాత్ మ‌రో 13 బాల్స్ మిగిలి ఉండ‌గానే విజ‌యం సాధించింది.