ఈ కుర్రాణ్ని మీరు గ‌మ‌నించ‌ట్లే గానీ..

ఈ సీజ‌న్‌లో నికోల‌స్ పూర‌న్, విరాట్ కోహ్లీ, మిచెల్ మార్ష్‌…ఇలా మాంచి హిట్ట‌ర్ల గురించే మాట్లాడుకుంటున్నాం గానీ..వీళ్ల‌కు ఏ మాత్రం తీసిపోని మ‌రో ప్లేయ‌ర్ గురించి కాస్త త‌క్కువ‌గానే మాట్లాడుకుంటున్నాం. అత‌డే మిస్ట‌ర్ క‌న్సిస్టెంట్, అసాధార‌ణ ప్ర‌తిభ ఉన్న బ్యాట‌ర్ సాయి సుద‌ర్శ‌న్. చాప‌కింద నీరులా త‌న‌ప‌ని తాను చేసుకుపోతూ హాఫ్ సెంచ‌రీలు బాదేస్తున్నాడు. ఈ సీజ‌న్ ఐపీఎల్‌లో ఇప్ప‌టి వ‌ర‌కు ఆడిన 5 మ్యాచుల్లో..వ‌రుస‌గా 74, 63, 49, 5, 82 ర‌న్స్ చేశాడు. చాలా కామ్ అండ్ కంపోజ్డ్‌, అందుకే అండ‌ర్ రేటెడ్ ప్లేయ‌ర్‌గా నిలుస్తున్నాడు. కానీ తానేంటో బ్యాట్‌తోనే స‌మాధానం చెబుతున్నాడు. మ్యాచ్ మ్యాచ్‌కూ రాటుదేలుతున్నాడు. తాజాగా రాజ‌స్థాన్ రాయ‌ల్స్‌తో జరిగిన మ్యాచ్‌లో ఈ యంగ్ లెఫ్ట్ హ్యాండెడ్ ఓపెన‌ర్ 53 బంతుల్లో 82 ప‌రుగులు చేశాడు. ఇందులో 8 ఫోర్లు, 3 సిక్స‌ర్లు ఉన్నాయి. రెండో వికెట్‌కు బ‌ట్ల‌ర్‌తో క‌లిసి 80 ప‌రుగుల భాగ‌స్వామ్యం, మూడో వికెట్‌కు షారుక్‌తో క‌లిసి 62 ప‌రుగుల భాగ‌స్వామ్యం న‌మోదు చేశాడు. గుజ‌రాత్ రెండొంద‌ల‌కు పైగా (217) స్కోరు సాధించ‌డంలో కీ రోల్ ప్లే చేశాడు.